Er það lúxus að lesa?

Blindraletrið nýtist svo fáum þannig að ekki er rétt að setja peninga í kaup á Blindraletursprentara.  Þetta eru rök sem að nefnd voru við mig í fullri alvöru af aðila sem hafði sýnt því áhuga að koma að söfnun á nýjum blindraletursprentara. 

Mér var brugðið og fór að velta þessu fyrir mér.

Í byrjun janúar skrifaði ég pistla þar sem ég fjallaði um blindraletur og þá staðreynd að þann 4 janúar voru 200 ár liðin frá fæðingu Louis Braille, en hann fann upp blindraletrið. Af þessu tilefni fjallaði fréttastofa RUV sjónvarps um gamlan og lasburða blindraletursprentara á Þjónustu og þekkingarmiðstöðinni fyrir blinda, sjónskerta og daufblinda einstaklinga. En það er einu prentarinn á landinu sem nýtist í að prenta bækur, svo sem eins og námsbækur. Þessi gripur er við það að gefast upp.

Á Íslandi er líklega mesta ólæsi í allri Evrópu meðal blindra og sjónskertra á blindraletur. Því miður var í góðærinu heykst á því að kaupa nýjan blindraletursprentara. Og nú er komin kreppa. 

Íslendingar eru fáir og tala tungumál sem engnir aðrir en þeir skilja. Við gerum kröfu til þess að íslenskan sé viðurkennd í alþjóðasamfélaginu og að t.d. tölvubúnaður sé aðlagaður að íslenskunni. Það eru ekki rök fyrir okkur að svo fáir tali íslensku, og að aðlögun fyrir svo fáa kosti of mikla fjármuni til að vera réttlætanleg.

Það sama á við um blindraletrið. Alveg eins og það eru mannréttindi okkar íslendinga að tillit sé tekið til tungumálsins okkar þá eru það mannréttindi þeirra sem reiða sig á lestur með blindraletri að útgáfa á efni á blindraletri sé ekki frá þeim tekin. Vegna þess að þeir eru svo fáir. Mannréttindi eru réttindi einstaklinga ekki fjöldans eða hópa.

Ég velti því fyrir mér hvort ríkið sé líklegra til að kaupa blindraletursprentara á krepputímum en það var á meðan góðærið stóð yfir. Einhverjum kann að kannski að finnst að sumir verði bara að neyta sér um þann lúxus að læra að lesa í kreppunni.    

Athugasemdir

[(IP-tala skráð) 17.2.2009 kl. 21:37]

Hvað kostar slík græja ????

Ég held að það sé best að senda beiðni á einhvern að þeim auðmönnum sem voru búnir að fá alla fjármuni bankanna "lánaða"  og ath hvort þeir "láni" ekki fyrir þessu með þeim skilyrðum að það verði greitt eftir minni og eða þegar við eigum sand af peningum hjá blindafélaginu.

[Kristinn Halldór Einarsson, 17.2.2009 kl. 22:01]

Verðlistaverð frá Noregi er á bilinu 10 -11 milljónir IKR á þeirri græju sem þarf að fá. Ef þyrfti að greiða vsk þá er upphæðin komin upp í 13 - 14 milljónir IKR.

[Magnús Geir Guðmundsson, 19.2.2009 kl. 23:37]

ER þá ekki réttara að tala um prentvél, frekar en prentara, fyrirbærið frámunalega dýrt!?

En nú voru settir miklir peningar í miðstöðina, var ekkert af þeim hugsaður einmitt til að kaupa tæki sem þetta?

[Kristinn Halldór Einarsson, 20.2.2009 kl. 09:13]

Það er auðvitað rétt athugað hjá þér Magnús að það er mikið nær að tala um prentvél. Þetta er græja sem þarf að hafa í sér búri vegna hávaða og þessa að það þarf að passa uppá rakastigið. Þett er einnig græja sem má ætla að verði í notkun í mörg ár. Upphafalega voru áætlaðir í þetta peningar en sú upphæð var ákveðin áður en gengishrunið átti sér stað og eitthvað virðist hafa dýpkað á þeim fjármunum sem áttu að hafa verið eyrnamerktir í þessi prentvélakaup. Við erum þó að reybna halda pressu á málinu og vonandi leysist það farsællega.

[Magnús Geir Guðmundsson, 20.2.2009 kl. 20:58]

Tek hjartanlega undir það og já það góða og rökstudda sjónarmið sem þú setur fram Kristin til samanburðar við mikilvægi blindra/punktaletrusins og að vélin verði keypt.