Bloggfærslur mánaðarins, maí 2008

Aðalfundur Blindrafélagsins

Nú er aðalfundur Blindrafélagsins lokið, en hann fór fram í gær, laugardaginn 17 maí. Á fundinum bar það m.a. til tíðinda að ég var kosinn formaður félagsins. Ég læt hér fyrir neðan fylgja frásögn Ágústu Eir Gunnarsdóttur af fundinum, sem var viðburðarríkur. Um kvöldið var síðan velheppnað skemmtikvöld sem UngBlind sá um og tókst það óhemjuvel og eru UngBlind færðar kærar þakkir.
"Aðalfundur Blindrafélagsins 
Þegar þetta er ritað er aðalfundi Blindrafélagsins ný lokið.
Hann gekk í alla staði afar vel, var langur, skemmtilegur og viðburðaríkur.
Fyrst ber að nefna að í hádegishléi afhenti Lionshreyfingin á Íslandi Blindrarfélaginu peningaupphæð sem safnaðist með sölu rauðu fjaðrarinnar í apríl sl. Þessi árlega söfnun Lionsmanna gekk að þessu sinni afar vel, framar öllum vonum segja sumir, en alls komu í hlut Blindrafélagsins 12 og hálf milljón króna og rennur það fé óskipt í leiðsöguhundaverkefni félagsins.
Sá sem afhenti afrakstur söfnunarinnar vildi koma á framfæri sérstökum þökkum til Friðgeirs Jóhannessonar og leiðsöguhundsins Errós fyrir að taka þátt í kynningu verkefnisins, m.a. með því að koma fram í Kastljósi sjónvarpsins. Þá vildi hann þakka Sigurjóni Einarssyni fyrir hans hlut, en hann var tengiliður félagsins og Lionsmanna í þessu verkefni.
Þá sagði  Halldór Sævar Guðbergsson nokkur orð, tók við fénu og færði Lionsmönnum borðfána Blindrafélagsins. Halldór sagði m.a. að hann vonaðist til að þessi söfnun væri aðeins upphafið að áframhaldandi samvinnu Lionshreyfingarinnar og Blindrafélagsins í framtíðinni.
Annar skemmtilegur viðburður átti sér stað á aðalfundinum.
Eftir hádegishlé tilkynnti Halldór Sævar að nú yrðu, í fyrsta sinn, veittir hvatningarstyrkir Blindrafélagsins.
Stjórn félagsins ákvað, fyrir skömmu, að koma á fót hvatningarstyrkjum og setti um þá ákveðnar reglur, t.d. varðandi umsóknir. Skipuð var úthlutunarnefnd og í henni eiga sæti þau Björk Vilhelmsdóttir, Erna Guðmundsdóttir og Helgi Seljan.
Helgi afhenti styrkþegum hvatningarstyrkina fyrir hönd nefndarinnar.
Sex umsóknir bárust og mat nefndin þær allar gildar.
Hámarks upphæð til úthlutunar voru 300 þúsund krónur.
Eftirtaldir hlutu styrki:
Guðfinnur Karlsson 100 þúsund krónur vegna keppnisferðar ´´i sundi,
Bergvin Oddsson 300 þúsund vegna útgáfu á unglingaskáldsögu sinni, en hún mun koma út þann 24. maí nk.,
Inga Sæland Ástvaldsdóttir 300 þúsund krónur vegna útgáfu á geisladiski með eigin söng. Diskurinn mun innihalda 4 til 6 lög og verður gerður í samvinnu við þekkta tónlistarmenn,
Rósa Ragnarsdóttir garðyrkjufræðingur 300 þúsund til kaupa á tækjum til garðyrkjuvinnu, en Rósa hyggst hefja garðyrkjuþjónustu á eigin vegum,
MarjaKaisa Mattíasson 100 þúsund vegna þátttöku í bókamessu í Finnlandi fljótlega, en þar mun hún m.a. kynna finnska þýðingu sína á bók eftir Aðalstein Ásberg Sigurðsson,
Helena Björnsdóttir 300 þúsund til kaupa á sérstöku vinnuborði til myndlistarstarfa, en Helena hyggst leggja myndlist meira fyrir sig.
Allir styrkþegar veittu styrkjunum viðtökur nema Helena sem búsett er í Noregi, Klara Hilmarsdóttir veitti styrknum viðtöku fyrir hennar hönd.
Fleiri stórtíðindi gerðust á aðalfundinum, kosinn var nýr formaður, tveir voru kjörnir í stjórn og tveir í varastjórn. Þá var kosið í þrjár nefndir.
Tveir voru í framboði til formanns, þeir Friðgeir Jóhannesson og Kristinn H. Einarsson. Atkvæði féllu þannig að Friðgeir fékk 11 atkvæði, Kristinn 48 atkvæði, auð og ógild voru 2 atkvæði.
Í framboði til stjórnar voru þau Einar Lee, Friðgeir Jóhannesson, Halldór Sævar Guðbergsson, Kolbrún Sigurjónsdóttir og Sigþór U. Hallfreðsson.
Atkvæði féllu þannig að Einar fékk 8 atkvæði, Friðgeir 17, Halldór Sævar 48, Kolbrún 32 og Sigþór 33.
Réttkjörnir í stjórn næstu tvö árin eru því þeir Halldór Sævar Guðbergsson og Sigþor U. Hallfreðsson.
Í framboði til varastjórnar voru þau Hlynur Þór Agnarsson, Kolbrún Sigurjónsdóttir og Lilja Sveinsdóttir.
Atkvæði féllu þannig að Hlynur fékk 24 atkvæði, Kolbrún 37 og Lilja 48.
Kolbrún og Lilja eru því kjörnar í varastjórn til næstu tveggja ára.
Við óskum öllum innilega til hamingju með kjörið.
Halldóri Sævari, fráfarandi formanni, voru þökkuð öll sín störf í þágu félagsins sem formaður, en hann er ekki farinn langt, mun sitja áfram í stjórn félagsins næstu tvö árin.
Þá var kosið í kjörnefnd, skemmtinefnd og tómstundanefnd.
Kjörnefndin var endurkjörin óbreytt, en í henni sitja þau Brynja Arthúrsdóttir, Bessi Gíslason og Ragnar R. Magnússon, og Sigtryggur R. Eyþórsson til vara.
Í skemmtinefnd voru eftirtaldir kjörnir:
Bergvin Oddsson, Grímur Þóroddsson, Inga Sæland Ástvaldsdóttir, Jóna Garðarsdóttir og Sigurjón Einarsson.
Í tómstundanefnd voru eftirtaldir kjörnir:
Guðrún Þórarinsdóttir, Gunnar Már Óskarsson, Inga Sæland Ástvaldsdóttir, Lilja Sveinsdóttir og Ólöf Valdimarsdóttir.
Fundarstjórar stóðu sig afar vel en það voru þau Ragnar R. Magnússon og Eva Þengilsdóttir og Ólafur Haraldsson var tiltækur til aðstoðar ef með þurfti.
Örugglega er ég að gleyma einhverju, en þá senda fleiri inn línur með meiri fréttum af aðalfundinum.
Bestu kveðjur,
Gústa."

Verkefnaskrá

Varðandi verkefni sem ég tel mikilvægt að Blindrafélagið sinni, án þess að upptalningin geti verið tæmandi, vil ég hér nefna nokkur. Fjöldi annarra verkefna mun síðar eiga eftir að rata inn á borð stjórnar félagsins sem ekki verður gerð grein fyrir hér.

Aðgengismál
Aðgengismál hafa verið að öðlast nýja merkingu í upplýsingasamfélagi nútímans. Mikilvægt er  að vinna áfram að bættu ferilfræðilegu aðgengi, sem full þörf er á að bæta víða á Íslandi. En jafnframt er mjög mikilvægt að huga að öðrum aðgengismálum, eins og aðgengi að upplýsingum. Vinna verður gegn þeirri þróun að upplýsingar séu klæddar í búning sem eru óaðgengilegri blindum og sjónskertum einstaklingum en öðrum. Hér má t.d. nefna atvinnuauglýsingar sem birtar eru sem myndir og því óaðgengilegar blindum tölvunotendum.

Akstursþjónusta
Þar sem aksturþjónustusamningar hafa náðst við sveitarfélög ríkir almenn ánægja meðal félagsmanna Blindrafélagsins. Ég vil beita mér fyrir því að fjölga enn frekar slíkum samningum þannig að félagsmenn í t.d. Kópsvogi, Mosfellsbæ, Árborg og fleiri sveitarfélögum geti notið sambærilegrar akstursþjónustu og í boðið er í t.d. í Reykjavík, Hafnarfirði og Akureyri.

Arfleifð
Að mínu mati býr Blindrafélagið að dýrmætri arfleifð sem m.a. lýsir sér í því að félaginu hefur farnast vel í að efna til samstarfs við ólíka aðila, bæði opinbera og óopinbera, til að vinna hagsmunamálum félagsmanna framgang. Blindrafélagið nýtur almenns velvilja í samfélaginu og ég vil leggja mitt af mörkum til að vernda hið góða orðspor félagsins sem er forsenda þessa velvilja.

Blindrafélagið 70 ára
Á árinu 2009 verða liðin 70 ár frá stofnun Blindrafélagsins og ég tel að þeirra tímamóta eigi að minnast með viðeigandi hætti.

Blindraletur - 200 ára afmæli Louis Braille
Á  árinu 2009 eru 200 ár liðin frá fæðingu Louis Braille, höfundi blindraletursins. Þessara tímamóta verður víða minnst og mikilvægt er að Blindrafélagið noti tækifærið til að kynna mikilvægi blindraleturs og notkun þess.  

Erlent samstarf
Ég legg áherslu á að Blindrafélagið sé fullgildur aðili í alþjóðasamstarfi. Í æ ríkari mæli eru lög og reglugerðir sem varða baráttu gegn hvers konar misrétti að verða til á vettvangi alþjóðastofnanna s.s. eins og ESB og Sameinuðu Þjóðanna.  Á vettvangi alþjóðasamstarfs blindrafélaga er unnið að kröfugerðum og eftirfylgni til að tryggja sem best hagsmuni félagsmanna þessara samtaka. Blindrafélagið á að vera fullgildur þátttakandi í þessu starfi.

 Hjálpartæki
Ég vil leggja áherslu á að úrval hjálpartækja sem blindu og sjónskertu fólki stendur til boða sé eins gott og kostur er. Mikilvægt er að Blindrafélagið fylgist vel með þeirri miklu þróun sem er í þessum málaflokki og sé virkt í því að hafa áhrif á framboð hjálpartækja. Skoða þarf sérstaklega fjármögnun hjálpartækja sem blindir og sjónskertir einstaklingar þurfa á að halda vinnu sinnar vegna.

Innra starf
Ég legg áherslu á að innra starf félagsins verði áfram öflugt. Ég vil stuðla að því að deildum og ráðum innan félagsins verði skapað gott svigrúm til að starfa og að áfram verði haldið úti tómstundastarfi í samræmi við óskir og þarfir félagsmanna. Í því sambandi er mikilvægt að taka tillit til óska þess stóra hluta félagsmanna sem kominn er á efri ár.

Leiðsöguhundaverkefnið
Mjög mikilvægt er að vel takist til með kynningu og framkvæmd á þessu verkefni þannig að leiðsöguhundarnir nýtist eigendum sínum sem best. Fara þarf í öflugt kynningarstaf til að kynna fyrir öllum almenningi umgengni við hundana og eigendur þeirra. Jafnframt þarf að kynna vel þann rétt sem eigendur og leiðsöguhundarnir hafa samkvæmt gildandi lögum og reglum. Ég vil síðan stuðla að því að fleiri félagsmönnum Blindrafélagsins gefist kostur á því að fá leiðsöguhund.

Rekstur félagsins
Ég legg mikla áherslu á að félagið verði áfram rekið af ráðdeild og hagkvæmni og að vel verði farið með eignir félagsins, og þær nýttar af ábyrgð og hagsmunum félagsmanna til framdráttar.

Sjálfsmat
Ég vil beita mér fyrir umræðu, bæði innan félagsins og á opinberum vettvangi, um hvernig blint og sjónskert fólk upplifir sig í samfélaginu,  og eins hvort blindir og sjónskertir einstaklingar hafi til að bera einhverja staðlaða ímynd meðal almennings.  Erum við kannski öll föst í einhverjum stöðluðum ímyndum, bæði meðal okkar sjálfra og meðal almennings, sem kunna að vera okkur fótakefli, og ástæða er til að gera atlögu að og breyta?

Sjónskertir
Staða sjónskerts fólks er mér hugleikin vegna minnar persónulegu reynslu. Ég vil beita mér fyrir fræðslu og umræðu um hvernig mismunandi sjónskerðingar geta haft áhrif á hæfni einstaklinga við mismunandi aðstæður í umhverfinu. Ég vil skoða sérstaklega hvort ástæða væri til að sjónskertir einstaklingar hefðu möguleika á að bera sérstakt auðkenni sem gæfi til kynna sjónskerðingu þeirra.  Það myndi leiða til að þessi hópur væri ekki eins ósýnilegur og hann er oft á tíðum. 

Tæknimál
Mikil og hröð þróun er í tæknimálum. Meðal þess má nefna að hin nýja stafræna tækni er nú að ryðja sér til rúms á miklum hraða. Víða erlendis eru systrasamtök Blindrafélagsins mjög virk að tryggja aðgang blinds og sjónskerts fólks að þessari tækni. Við þurfum að fylgjast vel með þessum málum og vinna að því að tryggja aðgengi blindra og sjónskertra einstaklinga að þessari tækni, og þeirri þjónustu sem mun byggja á henni. Ný tækni er sífellt að verða mikilvægari í nútímasamfélagi og því brýnt að Blindrafélagið sé vakandi fyrir að tryggja hagsmuni blindra og sjónskertra einstaklinga þegar kemur að innleiðingu hennar.

Þjónustu- og þekkingarmiðstöð
Ný þjónustu- og þekkingarmiðstöð er nú í mótun á vegum hins opinbera með þátttöku hagsmunaaðila, meðal annars Blindrafélagsins. Mjög mikilvægt er að Blindrafélagið taki virkan þátt í þeirri vinnu og geri allt sem í þess valdi er til að tryggja farsælan framgang þess verkefnis.
Hér má finna slóð inn á nefndarálit og tillögur sem sérstakur framkvæmdahópur vinnur nú eftir.

Þjónustuna undir eitt þak
"Þjónustuna undir eitt þak" er verkefni sem miðar að því að koma sem mest af lykilþjónustu við blinda og sjónskerta einstaklinga á einn stað.Ég legg áherslu á að áfram verði unnið að þessu verkefni  í samræmi við ályktun sem samþykkt var á félagsfundi Blindrafélagsins þann 5. febrúar 2008.


Náms-, félagsmála og starfsferill

Námsferill
1980 - 1985   Rafeindavirkjun Iðnskólanum í Reykjavík
1999 - 2000   Viðurkenndur bókari, Háskólinn Reykjavík
2008 -           Rekstrar og viðskiptafræði við Endurmenntun Háskóla Íslands, nám með vinnu.

Félagsmálaferill
1982 - 1984  Formaður Iðnnemasambands Íslands
1984 - 1985  Fræðslustjóri Iðnnemasambands Íslands
1986 - 1988  Seta í samráðs og samninganefnd námsmanna
samtakanna á Íslandi sem átti í samningaviðræðum við stjórnvöld um breytingar á námslánakerfinu.
1986 - 1988  Í stjórn OBESSU, Evrópskra námsmanna samtaka.        Fyrstur íslendinga sem þar náði kjöri.
1987 - 1989  Fyrsti formaður og einn af stofnendum SAGA, Suður       Afríkusamtakanna gegn Apartheid.
2006 - 2008  Gjaldkeri stjórnar Blindrafélagsins, samtaka blindra og    sjónskertra á Íslandi.

Starfsferill
1985 - 1986 Tæknimaður hjá RUV sjónvarpi.
1986 - 1988  Framkvæmdastjóri Bandalags Íslenskra sérskólanema.
1986 - 1988  Seta í stjórn Lánasjóðs íslenskra námsmanna.
1990 - 1993  Framkvæmdastjóri Iðnnemasambands Íslands.
1990 - 1993 Seta í Fræðsluráði iðngreina, skólanefnd Iðnskólans í       Reykjavík og samninganefnd ASÍ.
1993 - 1996 Framkvæmdastjóri Félagsíbúða iðnnema.
1997 - 2000 Framkvæmdastjóri bókhalds og rekstrarþjónustufyrirtækis  sem sá um launaútreikninga, bókhald og skrifstofurekstur fyrir mörg ólík fyrirtæki.
2000 - 2004 Framkvæmdastjóri eigin reksturs í innflutningi, dreifingu  og sölu á matvörum.
2004 - 2007 Markaðsstjóri hjá Nathan og Olsen, innflutningur og sala á matvörum á smásölumarkað.
2007 - 2008 Sölu og markaðsstjóri Ekrunnar, innflutningur og dreifing á matvöru á veitingamarkað.


Framboð til formanns Blindrafélagsins, samtaka blindra og sjónskertra á Íslandi

Þá  ákvörðun að gefa kost á mér í embætti formanns Blindrafélagsins tók ég eftir að hafa átt samtal við marga félagsmenn Blindrafélagsins. Í þeim hópi eru almennir félagsmenn, fyrrverandi forustumenn og fólk sem skipar núverandi forustu. Allt eru þetta einstaklingar hverra álit og viðhorf ég met mikils. Þessi samtöl hafa leitt í ljós að framboð mitt virðist njóta nokkuð breiðs stuðnings og því ekki sett fram í tómarúmi. Að auki hef ég verið fullvissaður um að ég muni njóta bæði stuðnings og liðsinnis margra þessara einstaklinga, verði ég kjörinn formaður.

Ég heiti félagsmönnum Blindrafélagsins því,nái ég kjöri sem fomaður, þá muni ég starfa af alúð og heiðarleika fyrir félagið og leggja mitt af mörkum til að vinna hagsmunamálum félagsins og félagsmanna brautargengi sem best ég get.

Ég


Innskráning

Ath. Vinsamlegast kveikið á Javascript til að hefja innskráningu.

Hafðu samband